[Gandur] Góssið hans Árna
Aðalheiður Guðmundsdóttir
adalh at hi.is
Thu Oct 20 11:14:31 GMT 2011
Góssið hans Árna — erindaröð um handrit úr safni Árna Magnússonar
Laugardaginn 22. október – fyrsta vetrardag – verður hleypt af
stokkunum erindaröð um valin handrit úr safni Árna Magnússonar.
Erindin verða síðan á dagskrá annan hvern miðvikudag í allan vetur, og
lýkur síðasta vetrardag, 18. apríl.
Erindin eru haldin í tilefni þess að handritasafn Árna Magnússonar
hefur verið tekið upp á varðveisluskrá Menningarmálastofnunar
Sameinuðu þjóðanna UNESCO „Minni heimsins“. Tilgangur
varðveisluskrárinnar er að vekja athygli á mikilvægi þess að varðveita
andlegan menningararf veraldar með því að útnefna einstök söfn sem
hafa sérstakt varðveislugildi. Upptaka safns Árna á skrána felur í sér
mikla viðurkenningu á íslenskum handritaarfi. Í rökstuðningi segir að
handritasafn Árna Magnússonar geymi ómetanleg handrit um sögu og
menningu Norðurlanda, og raunar stórs hluta Evrópu, allt frá miðöldum
til nýaldar, og eru Íslendingasögurnar nefndar sem sérstakt dæmi um
þau verk á heimsvísu sem handritin geyma.
Handritasafnið, sem varðveitt er á Árnastofnununum tveimur í Reykjavík
og Kaupmannahöfn, geymir um 3000 handrit frá miðöldum og síðari öldum
auk mörg þúsund skjala. Ákvörðun UNESCO vekur mikla athygli á
mikilvægi handritanna í alþjóðlegu samhengi og sýnir að þau eiga
erindi við heiminn allan.
Með erindaröðinni Góssið hans Árna er ætlunin að kynna almenningi
einstök handrit úr safni Árna og sýna um leið fjölbreytni þess.
Erindin verða haldin í bókasal Þjóðmenningarhússins, þar sem gestum
gefst kostur á að skoða handritið sem til umfjöllunar er hverju sinni.
Fyrsta erindið heldur Guðrún Nordal, forstöðumaður Árnastofnunar og
hefst það kl. 15, laugardaginn 22. október. Þar fjallar hún um
kvæðahandrit Gísla Jónssonar biskups sem hann skrifaði hugsanlega
handa Helgu dóttur sinni og geymir bæði kaþólsk helgikvæði og lúterska
sálma. Næsta erindi í röðinni verður miðvikudaginn 26. október kl.
12.15 þegar Guðrún Ása Grímsdóttir fjallar um merka skjalabók vestan
af fjörðum sem skráð var á 17. öld af sr. Sigurði Jónssyni frá
Vatnsfirði. Aðgangur er ókeypis og öllum heimill. Nánari upplýsingar
um dagskrá erindaraðarinnar má sjá á slóðinni www.arnastofnun.is/page/hand_gossid_hans_arna
Einnig veitir Svanhildur Óskarsdóttir (salta at hi.is — s. 525 4012; 846
6788) frekari upplýsingar.
________________________________
Aðalheiður Guðmundsdóttir,
aðjunkt / Adjunct Lecturer, Folkloristics dept.
Háskóli Íslands / University of Iceland
Sími/Tel.: +354 5255416/+354 8680306
http://uni.hi.is/adalh/
More information about the Gandur
mailing list