[Gandur] Frásagnir um fermingar í samtímanum
agust at thjodminjasafn.is
agust at thjodminjasafn.is
Mon Apr 18 14:37:29 GMT 2011
Sælir þjóðfræðingar og þjóðfræðinemar.
Eru einhverjir á þessum póstlista sem gætu hugsað sér að leggja
Þjóðminjasafni Íslands lið við söfnun heimilda um fermingar í samtímanum?
Þjóðminjasafnið er um þessar mundir að fara af stað með söfnun heimilda um
fermingarsiði og verður spurningaskrá um þetta efni send út síðar á árinu.
Þegar hafa verið tekin viðtöl við fulltrúa nokkurra trúfélaga og
fermingarmessa sótt.
Ef til vill eru einhverjir á leið í fermingarathöfn eða fermingarveislu á
næstu dögum eða hafa tekið þátt í þessari siðvenju nýlega. Það sem safnið
er einkum með í huga eru frásagnir af vettvangi, sérstaklega úr
fermingarveislum.
Áhugavert væri að fá upplýsingar um sem flest eftirtalinna atriða: 1) Hvar
er veislan haldin? 2) Klukkan hvað byrjar veislan og hve lengi stendur
hún? 3) Hvaða veitingar eru á boðstólum (telja upp ef unnt er)? 4) Í hvaða
mæli eru veitingar aðkeyptar eða heimatilbúnar? 5) Er kokkur eða
þjónustufólk / ólaunað aðstoðarfólk á staðnum? 6) Hve margir eru
veislugestir á að giska og hve margir af þeim voru viðstaddir
fermingarathöfnina? 7) Hverjum er boðið (á athöfnina, í veisluna t.d.)? 8)
Hverjir sitja saman við borð (fjölskyldur eða blandaður hópur t.d.)? 9) Um
hvað er helst rætt við þitt borð (dægurmál, ferminguna t.d.)? 10) Blóm og
skreyting á veislusal. 11) Klæðnaður veislugesta (einhverjir í
hversdagsfötum t.d.)? 12) Klæðnaður fermingarbarns (nýkeyptur fatnaður,
jakkaföt, kjóll t.d.)? 13) Hárgreiðsla / klipping fermingarbarns? 14)
Gjafir (hvað er gefið, hve mikið má gjöfin kosta, peningaupphæð t.d.)? 15)
Eru gjafir afhentar fermingarbarninu við komuna í veisluna eða settar á
borð? 16) Eru gjafir opnaðar meðan á veislunni stendur eða eftir á? 17)
Eru haldnar ræður (hver talar, hvað er sagt t.d.)? 18) Lifandi
tónlistarflutningur (söngur, hljóðfæraleikur, hverjir flytja og hvenær í
veislunni)? 19) Önnur skemmtiatriði? 20) Annað sem þú vilt taka fram.
Stafrænar ljósmyndir eru vel þegnar, ef unnt er, en ekki nauðsyn. Ekki er
farið fram á lýsingu á sjálfri fermingarathöfninni nema ef einhver hefði
áhuga á því og er það einnig vel þegið.
Verkefnið er liður í rannsókn á trúarsiðum Íslendinga á vegum
Þjóðminjasafnsins sem hófst árið 2002 með styrk frá Kristnihátíðarsjóði.
Áður hafa verið sendar út spurningaskrár um brúðkaupssiði á síðari hluta
20. aldar, andlát og utför á seinni hluta 20. aldar og nafngjöf og skírn.
Þeir sem áhuga hefðu á taka þátt í þessu verkefni eða óska eftir frekari
upplýsingum eru vinsamlegast beðnir um að setja sig í samband við
undirritaðan.
Bestu kveðjur
Ágúst Ólafur Georgsson
fagstjóri þjóðhátta
Þjóðminjasafni Íslands
Suðurgata 43
101 Reykjavík
Sími 5302200/ 5302273
Netfang agust at thjodminjasafn.is
More information about the Gandur
mailing list