[Gandur] Óþekkt augnablik - ný sýning í Þjóðminjasafninu
frettatilkynning at thjodminjasafn.is
frettatilkynning at thjodminjasafn.is
Fri Sep 11 13:47:36 GMT 2009
Óþekkt augnablik
Laugardaginn 12. september verður ljósmyndasýningin Óþekkt augnablik opnuð
í Þjóðminjasafni Íslands. Sýningin er greiningarsýning á ljósmyndum frá
tímabilinu 1900-1960 úr Ljósmyndasafni Íslands í Þjóðminjasafni. Leitað er
aðstoðar safngesta við greiningu myndefnis.
Í hundrað ár hefur Þjóðminjasafn Íslands safnað ljósmyndum. Söfnunin hefur
haldist í hendur við þróun ljósmyndunar. Ljósmyndir eru samofnar lífi
eigandans, einskonar minningabanki sem hann leitar í. Fólk lætur
ljósmyndir ekki af hendi fyrr en þær missa gildi sitt. Þannig voru það
fyrst brúntóna harðspjaldamyndir af uppstilltu fólki í sínu fínasta pússi
sem bárust safninu til varðveislu. Seinna bættust í sarpinn myndir af
bæjum til sveita, götum þorpa, af fólki að störfum úti og inni og íslensku
landslagi með sínum fossum og fjöllum. Eftir að atvinnumenn hættu að sitja
einir að myndatökum og fólk fór sjálft að skapa sér eigin myndasöfn fóru
litlar skyndimyndir að berast. Vinafólkið á ferðalagi, nesti snætt í laut,
daglegt líf fjölskyldunnar heima og heiman. Það líður langt frá
myndatökunni og þar til mynd verður að safngrip og því er enn lítið af
litmyndum í safninu og enn lengra í land þar til símamyndir samtímans munu
berast ef að þær hverfa ekki við endurnýjun farsímans.
Stærsti hluti myndasafnanna eru samt ekki pappírsmyndir heldur glerplötur
og filmur frá atvinnu- og áhugamönnum. Á þessari sýningu er brugðið upp
myndum úr sex slíkum filmusöfnum. Þeim er ætlað að sýna þverskurð af
viðfangsefnum ljósmyndaranna og sýna þróun íslensks samfélags á þeirri
rúmu hálfu öld sem þær spanna. Jafnframt eru þær gestaþraut þar sem leitað
er í smiðju safngesta um þekkingu á því sem myndirnar sýna. Hvar eru
myndirnar teknar? Hvaða fólk er á þeim?
Í tengslum við sýninguna hefur verið opnað sérstakt vefsvæði á heimasíðu
Þjóðminjasafnsins. Þar er hægt að skoða myndirnar og geta gestir skráð
athugasemdir við þær ef þeir þekkja til fólks eða staða á myndunum.
Upplýsingarnar eru síðan yfirfarnar og skráðar í gagnagrunn safnsins.
Upplýsingar sem safnast með þessum hætti eru safninu einkar mikilvægar því
þær setja nafnlausar myndir í nýtt samhengi og segja sögur sem annars
hefðu fallið í gleymskunnar dá.
Með bestu kveðju,
Helga Vollertsen
Kynningarstjóri
Þjóðminjasafni Íslands
v/Suðurgötu
101 Reykjavík
s. 5302222/gsm 8242039
helga.vollertsen at thjodminjasafn.is
-------------- next part --------------
An HTML attachment was scrubbed...
URL: http://listar.hi.is/pipermail/gandur/attachments/20090911/41f22f4b/attachment-0001.html
-------------- next part --------------
A non-text attachment was scrubbed...
Name: not available
Type: image/gif
Size: 51507 bytes
Desc: not available
Url : http://listar.hi.is/pipermail/gandur/attachments/20090911/41f22f4b/attachment-0001.gif
More information about the Gandur
mailing list