[Gandur] Jólin koma! Jóladagskrá Þjóðminjasafnsins hefst sunnudaginn 6. desember.
frettatilkynning at thjodminjasafn.is
frettatilkynning at thjodminjasafn.is
Thu Dec 3 09:35:03 GMT 2009
Jólin koma!
Jóladagskrá Þjóðminjasafns Íslands hefst með pompi og prakt sunnudaginn 6.
desember. Dagskráin hefst kl. 14 og er aðgangur ókeypis.
Pollapönkararnir Heiðar Örn Kristjánsson og Haraldur Freyr Gíslason,
einnig þekktir sem Heiðar og Halli úr Botnleðju, munu spila fyrir
krakkana. Grýla, Leppalúði og Jólakötturinn kíkja í heimsókn og ræða við
börnin um íslenska jólasiði. Á Torginu er sýningin Sérkenni sveinanna,en
þar má sjá jólahús með gripum sem tengjast jólasveinunum. Gripina má
snerta og geta þeir hjálpað börnum að skilja nöfn jólasveinanna. Í forsal
á 3. hæð safnsins verður jafnframt hægt að skoða gömul jólatré.
Þá gefst færi á að fara í jólaratleikinn Hvar er jólakötturinn? og finna
litlu jólakettina sem hafa verið faldir innan um safngripina. Fleiri
fjölskylduleikir eru í boði í afgreiðslu safnsins.
Upplagt er að nota tækifærið og skoða sérsýningar Þjóðminjasafnsins. Þar á
meðal er sýningin Ása G. Wright – frá Íslandi til Trinidad, sem opnuð
var 28. nóvember s.l. Þar getur að líta hluta þeirra gripa sem Ása gaf
safninu á 7. áratug síðustu aldar. Bók um ævi Ásu, Kona þriggja eyja eftir
Ingu Dóru Björnsdóttur, kom nýlega út hjá Forlaginu.
Sýningin Endurfundir er á 1. hæð safnsins, bak við Kaffitár og Safnbúð.
Endurfundir er fornleifasýning ætluð allri fjölskyldunni, þar sem hægt
er að skoða gripi sem fundust við fornleifarannsóknir víðsvegar um landið
á árunum 2001-2005. Auk gripanna er hægt að skoða myndasýningar frá
uppgröftunum, leira, stimpla með gotnesku letri eða fara í fræðsluspor
fjölskyldunnar og leysa skemmtilegar þrautir. Einnig eru þarna leynikassar
sem eru skemmtilegir fyrir yngstu gestina - og jafnvel þá sem eldri eru!
Á ljósmyndasýningunni Óþekkt augnablik í Bogasal á 2. hæð eru safngestir
beðnir um aðstoð við greiningu myndefnis. Á sýningunni eru myndir úr
Ljósmyndasafni Íslands í Þjóðminjasafni, en lítið er vitað um fólk og
staði á myndunum og geta gestir bætt við upplýsingum þar sem þeir þekkja
til.
Safnbúðin er að vanda full af þjóðlegum leikföngum, vönduðum minjagripum,
íslenskri hönnun og bókum. Hér er hægt að fá margs kyns gjafavöru í
jólapakkann og auðvitað bæði kerti og spil. Í safnbúðinni fæst einnig
suðusúkkulaði í fallegum umbúðum og uppskrift að heitu súkkulaði fylgir
með.
En það er líka tilvalið að ljúka heimsókninni með því að fá sér heitt
súkkulaði og meðlæti í Kaffitári. Þar fást einnig gjafapakkar með
kaffibaunum og fleira góðgæti.
Með bestu kveðju,
Helga Vollertsen
Kynningarstjóri
Þjóðminjasafni Íslands
v/Suðurgötu
101 Reykjavík
s. 5302222/gsm 8242039
-------------- next part --------------
An HTML attachment was scrubbed...
URL: http://listar.hi.is/pipermail/gandur/attachments/20091203/23a842f5/attachment-0001.html
-------------- next part --------------
A non-text attachment was scrubbed...
Name: not available
Type: image/gif
Size: 30851 bytes
Desc: not available
Url : http://listar.hi.is/pipermail/gandur/attachments/20091203/23a842f5/attachment-0001.gif
More information about the Gandur
mailing list