[Gandur] Leiðsögn um Undrabörn - Einar Falur Ingólfsson "eys úr viskubrunnum" 8. jan. kl. 12:05 í Þjóðminjasafninu
frettatilkynning at thjodminjasafn.is
frettatilkynning at thjodminjasafn.is
Fri Jan 4 16:36:37 GMT 2008
Leiðsögn um Undrabörn
Einar Falur Ingólfsson ljósmyndari og nemandi Mary Ellen Mark ,,eys úr
viskubrunnum“ um sýningu hennar í Þjóðminjasafninu 8. janúar klukkan 12:05
Þriðjudaginn 8. janúar klukkan 12:05 verður fyrsta sérfræðileiðsögn
Þjóðminjasafnsins á nýju ári. Að þessu sinni býðst gestum leiðsögn hjá
Einari Fali Ingólfssyni ljósmyndara um ljósmyndasýninguna Undrabörn sem nú
stendur yfir í Myndasal Þjóðminjasafnsins. Þar getur að líta myndir sem
hinn heimsþekkti bandaríski ljósmyndari Mary Ellen Mark hefur tekið af
fötluðum börnum á Íslandi.
Ljósmyndirnar sýna veruleika þessara barna í samtímanum, en Mary Ellen
Mark er þekkt fyrir myndir þar sem horfst er í augu við raunveruleikann. Á
sýningunni er sjónum einnig beint að skólaumhverfi barnanna í ljósmyndum
Ívars Brynjólfssonar á Veggnum og listsköpun barnanna sjálfra er til sýnis
í anddyrinu.
Í tengslum við sýninguna Undrabörn gaf Þjóðminjasafn Íslands út samnefnda
bók með ljósmyndum Mary Ellen Mark og Ívars Brynjólfssonar. Bókin hefur
verið tilnefnd til Íslensku bókmenntaverðlaunanna í flokki fræðirita og
bóka almenns efnis árið 2007. Einar Falur Ingólfsson ritar inngang en
formáli er eftir Margréti Hallgrímsdóttur þjóðminjavörð.
Nú gefst tækifæri til að fá leiðsögn um sýninguna en brátt verða síðustu
forvöð að sjá hana. Vegna mikillar aðsóknar og góðra undirtekta hefur þó
verið ákveðið að framlengja henni til 3. febrúar.
Einar Falur Ingólfsson hefur á síðustu tveimur áratugum unnið með Mary
Ellen Mark að ýmsum verkefnum, bæði í Bandaríkjunum og hér á landi. Meðal
kunnustu verkefna hennar eru líf heimilislausra ungmenna í Seattle, starf
líknarstofnunar móður Teresu í Kolkata, vændishús í Mumbay og lífið í
indversku fjölleikahúsi.
Í leiðsögninni á þriðjudaginn mun Einar Falur fjalla um aðdraganda
sýningarinnar í Þjóðminjasafninu og verkefnið almennt. Hann mun rekja
feril Mary Ellen Mark og kvikmyndagerðarmannsins Martin Bell sem starfaði
með henni við undirbúning og segja frá hugmyndum listamannanna um
verkefnið.
Martin Bell gerði heimildamynd um Alexander Viðar Pálsson, einn nemanda
Öskjuhlíðarskóla, og er hún sýnd daglega frá klukkan 13 í fyrirlestrarsal
Þjóðminjasafnsins meðan á ljósmyndasýningunni stendur. Milli ljósmynda
Mary Ellen Mark og kvikmyndar Martin Bell er mikilvægt samspil sem dýpkað
getur upplifunina af sýningunni í heild. Þeir sem skoða sýninguna eða
bókina ættu því ekki að láta kvikmyndina fram hjá sér fara.
Mary Ellen Mark kom til Íslands á árið 2006 og myndaði meðal annars
nemendur í Öskjuhlíðarskóla en hún heillaðist mjög af því starfi sem þar
er unnið. Í kjölfarið leitaði Þjóðminjasafn Íslands eftir samstarfi við
hana um að ljósmynda líf fatlaðra barna á Íslandi. Myndataka Mary Ellen
Mark fyrir sýninguna fór aðallega fram í Öskjuhlíðarskóla, Safamýrarskóla
og Lyngási.
Þetta metnaðarfulla verkefni hlaut meðal annars styrk úr Menningarsjóði
Glitnis. Árangurinn er sýningin Undrabörn og samnefnd sýningarbók.
Fólk er hvatt til að fjölmenna á leiðsögn Einars Fals Ingólfssonar 8.
janúar en sýningin stendur til 3. febrúar.
Bestu kveðjur / Best regards
Rúna K. Tetzschner
kynningarstjóri / Public Relation Manager
Þjóðminjasafn Íslands / National Museum of Iceland
Suðurgötu 41 - 101 Reykjavík
fars. 824-2039, s. 530-2222 eða 5302248
netf. runa at thjodminjasafn.is
veff. http://www.thjodminjasafn.is
-------------- next part --------------
An HTML attachment was scrubbed...
URL: http://listar.hi.is/pipermail/gandur/attachments/20080104/ad393250/attachment.html
More information about the Gandur
mailing list