[Gandur] Þjóðfræðibíó á sunnudaginn!
Valdimar Tryggvi Hafstein
vth at hi.is
Thu Mar 29 14:34:25 GMT 2007
Sælir þjóðfræðingar,
Mig langar að vekja sérstaka athygli ykkar á bíósýningu í Tjarnarbíó á
sunnudaginn kl. 17, en þá sýnir Kviksaga þar heimildamynd eftir
þjóðfræðinginn Timothy Tangherlini og félaga hans Stephen J. Epstein um
pönk í Suður-Kóreu. Einnig verður sýnt úr bráðfyndinni og dálítið
óhugnanlegri heimildamynd Tangherlini, Talking Trauma, um
sjúkraflutningamenn í Oakland og kaldhæðna frásagnarhefð þeirra, en ég get
borið um að sú mynd er frábær og hef notað hana í kennslu í Þjóðfræði
samtímans.
Kollegi okkar Kristinn Schram gerir svo áhorfendum í Tjarnarbíói grein
fyrir fræðilegum bakgrunni þessara heimildamynda og -- það sem mestum
tíðindum sætir -- sýnir okkur jafnframt brot úr sinni eigin mynd,
Negotiating the City, sem byggir á rannsókn hans á frásögnum
leigubílstjóra í Edinborg.
Til að toppa skemmtunina er aðgangur ókeypis og allir velkomnir.
Ég mæli eindregið með þessari fínu þjóðfræðilegu sunnudagsskemmtun svona
áður en dymbilvikan gengur í garð.
Sjáumst svo á morgun á afmælisþingi Jóns Hnefils á Þjóðminjasafninu.
Bestu kveðjur,
Valdimar
----------------------------------------
KVIKSAGA KYNNIR:
Frásagnamenning og mótstaða í nútímaborgum
Tjarnarbíó, sunnudaginn 1. apríl kl. 17:00
Our Nation: A Korean Punk Rock Community (2002)- Stephen Epstein og
Tim Tangherlini
Talking Trauma Tim Tangherlini (1995)
Verk í vinnslu: Negotating the City (stutt sýnishorn) Kristinn Schram
Aðalmynd kvöldsins Our Nation, gerist í kjölfar alþjóðavæðingar og
batnandi efnahags í Suður-Kóreu en þá spruttu upp nýjir
menningarkimar ungs fólks. Frá 1994 1999 fylgdust
heimildamyndargerðarmennirnir með næturklúbbnum Drug og uppkomu
hljómsveitanna Crying Nut og Yellow Kitchen. Mynd þeirra skoðar þær
flóknu leiðir sem ungt fólk fer til að skapa eigin sjálfsmynd í á
margan hátt íhaldsömu þjóðfélagi. Hún ljair þeirri margradda frásögn
eyra sem vekur máls á samfélagsmálum eins og kyngervingu í kóreisku
pönki, hlutverki skólakerfisins í lífi æskunnar og þeim hröðu
breytingum sem eiga sér stað innan menningarkimanna sjálfra sem bera
þá nær og nær meginstraumnum. Í Talking Trauma fylgist
þjóðfræðingurinn Tim Tangherlini með kaldhæðnislegum frásögnum
sjúkraflutningamanna. Sögur þeirra eru skoðaðar sem úrlausn erfiðrar
reynslu og liður í valdabaráttu við samstarfsmenn sem oft tekur á sig
grátbroslegar myndir. Kristinn Schram, þjóðfræðingur, segir frá
fræðilegum bakgrunni þessara heimildamynda og sýnir brot úr
Negotiating the City sem fjallar um rannsókn hans á frásögnum
leigubílstjóra í Edinborg.
Allir velkomnir og aðgangur ókeypis.
More information about the Gandur
mailing list