[Gandur] Ruth Christie í Þjóðarbókhlöðu

[Rósa Þorsteinsdóttir]

Textinn sem Terry sendi um þetta var eitthvað brenglaður svo ég sendi þetta 
aftur:

Ruth Christie í Þjóðarbókhlöðu

Kanadíski sagnaþulurinn Ruth Christie sem er af indíánættum heldur
fyrirlestra í fyrirlestrasal Þjóðarbókhlöðu föstudaginn 28. og laugardaginn
29. mars.
Fyrri fyrirlesturinn hefst kl. 16:30, þar segir hún frá fjölskyldu sinni og
samskiptum hennar við íslensku innflytjendurna sem settust að á "Nýja
Íslandi" árið 1875. Síðari fyrirlesturinn hefst kl. 14:00 og fjallar um Cree
tungumálið.

Langafi Ruth Christie var John Ramsey, indíáni af ætt Cree, en hann reyndist
íslenskum innflytjendum mjög vel og var í miklum metum meðal þeirra.
Afkomendur hans eru stoltir af þjóðerni sínu og einnig tengslum sínum við
afkomendur Íslendinganna.

Langa-langafi Ruth var Joseph Monkman, skoti sem leiðbeindi sendimönnunum
sem leituðu að heppilegum stað fyrir íslenska innflytjendur við Winnipegvatn
árið 1875. Jospeh var einnig um borð í SS Colville sem flutti fyrstu 285
Íslendingana til Willow Point.

Ruth Christie ólst upp við Loon Straits sem er frekar einangruð
fiskveiðibyggð við austurströnd Winnipegvatns.  Hún lærði sagnalistina af
móður sinni sem hafði þann háttinn á að segja börnum sögur á hverju kvöldi.
Ruth er hjúkrunarkona að mennt en hefur starfað lengi við virkið Lower Fort
Gary við leiðsögn.  Þar tekur hún á móti gestum í gervi langa-langömmu
sinnar, Isabella Setter-Monkman, segir þeim sögu indíána, fræðir um
lifnaðarháttu þeirra og sýnir listiðju indíána.  Margir Íslendingar sem sótt
hafa Íslendingabyggðirnar í Kanada heim hafa hitt Ruth og hrifist af
frásögnum hennar.

Heimsókn hennar er liður í menningarsamskiptum milli Þjóðræknifélags
Íslendinga og Þjóðræknifélags Íslendinga í N-Ameríku

Fyrirlestrar Ruth Christie eru öllum opnir og aðgangseyrir er enginn.