[Vid-stund] Ónákvæmni í verðbólguspám, verðbólgumarkmið og ávöxtunarviðmið lífeyrissjóða - föstudaginn 9. mars kl. 11 í fundarherbergi á 3. hæð í Odda.

[Bjargey Anna Guðbrandsdóttir]

Ónákvæmni í verðbólguspám, verðbólgumarkmið og ávöxtunarviðmið 
lífeyrissjóða
Föstudaginn 9. mars kl. 11-12
Í fundarherbergi á 3. hæð í Odda

Föstudaginn 9. mars flytur Yngvi Harðarson erindi á málstofu 
Hagfræðideildar undir yfirskriftinni Ónákvæmni í verðbólguspám, 
verðbólgumarkmið og ávöxtunarviðmið lífeyrissjóða.

Greiningaraðilar á fjármálamarkaði birta spár um verðbólgu og um 
mánaðarlega þróun vísitölu neysluverðs. Frá því að verðbólgumarkmið var 
tekið upp hefur vanspá verðbólgu verið mun algengari en ofspá og á það 
bæði við ársspár og mánaðarlegar spár sem gjarnan eru birtar nokkrum dögum 
fyrir birtingu vísitölu neysluverðs.

Nákvæmni mánaðarlegra spáa minnkaði verulega á árinu 2008 en hefur aukist 
á ný. Varpað er fram spurningunni um hvort áfram megi búast við aukinni 
nákvæmni eða hvort ónákvæmni í spágerðinni breytist með kerfisbundnum 
hætti og muni þá aukast á ný?

Þótt óverðtryggðar eignir vegi ekki þungt í eignasöfnum lífeyrissjóða þá 
hafa sjóðirnir í auknum mæli fjárfest í óverðtryggðum skuldabréfum. Hefur 
umræða verið um aukna þýðingu slíkra fjárfestinga í samhengi við mögulega 
óverðtryggða skuldabréfaútgáfu Íbúðalánasjóðs. Skv. reglugerð er núvirði 
óverðtryggðra skuldabréfa með fasta vexti metið m.v. 3,5% ávöxtunarkröfu 
auk verðbólguálags sem svarar til verðbólgumarkmiðs Seðlabanka Íslands á 
hverjum tíma. Með hliðsjón af reynslunni frá upptöku verðbólgumarkmiðs 
Seðlabankans er varpað fram spurningunni um hvort eðlilegt sé að nota það 
í tengslum við núvirðingu og ef ekki hvað þá?

Yngvi Harðarson útskrifaðist með cand. oecon próf frá þjóðhagskjarna 
Viðskipta- og hagfræðideildar árið 1986 og með MA próf í hagfræði frá 
Queen?s University í Kanada árið 1988. Yngvi hefur starfað sem 
hagfræðingur á Þjóðhagsstofnun, hagfræðingur Félags Íslenskra iðnrekenda 
og í fjármálageiranum. Þá var hann um tíma aðjúnkt við Viðskipta- og 
hagfræðideild HÍ. Nú rekur Yngvi fyrirtækið Analytica ehf. sem er óháð 
ráðgjafarfyrirtæki á sviði fjármála og áhættustýringar.
-------------- next part --------------
An HTML attachment was scrubbed...
URL: http://listar.hi.is/pipermail/vid-stund/attachments/20120306/2585c4ea/attachment-0001.html 
-------------- next part --------------
A non-text attachment was scrubbed...
Name: not available
Type: image/jpeg
Size: 128636 bytes
Desc: not available
Url : http://listar.hi.is/pipermail/vid-stund/attachments/20120306/2585c4ea/attachment-0001.jpe