[Gandur] Nöfn og þjóðtrú fimmtudag
Aðalheiður Guðmundsdóttir
adalh at hi.is
Wed Dec 6 09:39:22 GMT 2006
Nöfn og þjóðtrú: Þemakvöld Félags þjóðfræðinga á Íslandi
Næsta þemakvöld Félags þjóðfræðinga verður fimmtudaginn 7. desember
kl. 20.00. Fyrirlesarar eru Svavar Sigmundsson og Kendra Willson.
Þemakvöldið fer að venju fram í húsi Sögufélagsins við Fischersund.
Svavar Sigmundsson, rannsóknardósent á Stofnun Árna Magnússonar í
íslenskum fræðum og fyrrverandi forstöðumaður Örnefnastofnunar:
Örnefni og þjóðtrú.
Kendra Jean Willson, doktorsnemi í norrænum fræðum við
Kaliforníuháskóla í Berkeley: Sögur af ónöfnum. Frá Satan til Sataníu.
Á hverjum tíma og í hverju samfélagi eru skráðar eða óskráðar reglur
um mannanöfn. Á Íslandi hefur lengi verið sterk hefð fyrir því að
láta börn heita í höfuðið á eða eftir ættingjum. Því hefur verið
haldið fram að það að vitja nafns í draumi sé aðferð (social
strategy) sem gerir foreldrum kleift að víkja frá þessari hefð og
koma nýjum nöfnum inn í ættina. Báðar lýsa aðferðirnar togstreitu á
milli hvatar til að nota nafngjafir til sjálfstjáningar og til að
halda í gömlu hefðina og þá ætt- og þjóðrækni sem hún er talin bera
vott um.
Fyrr í tímum var það á ábyrgð presta að gæta þess að börnum yrðu ekki
gefin nöfn sem samfélagið taldi óviðeigandi. Á 20. öld voru sett lög
um mannanöfn (1913, 1925, 1991, 1996) og ábyrgð fyrir framkvæmd
þeirra færðist frá embættismönnum kirkjunnar yfir á veraldleg
yfirvöld og stofnanir (Dómsmálaráðuneyti, Mannanafnanefnd,
Hagstofu). Á sama tíma hefur breytt samfélagsmynd haft í för með sér
breytingar á gildi eða vægi mannanafna. Mannanafnalögin hafa einnig
tengst innflytjendamálum á Íslandi þar sem íslenskt nafn var
forsenda fyrir íslenskum ríkisborgararétti frá 1952 til 1996.
Fjallað verður um mannanöfn sem menn á Íslandi eru sagðir hafa viljað
taka upp eða skíra börnin sín en sem andleg eða veraldleg yfirvöld
hafa hafnað eða aðrir í samfélaginu fordæmt – frá sögunni ,,Satan
vitjar nafns” (Jón Árnason 1954, II: 25-26) til nafna eins og
Satanía, sem Mannanafnanefnd hafnaði fyrir nokkrum árum. Orðræða
tengd þessum ,,nafnaskrípum” eða ,,ónefnum” varpar ljósi á hugmyndir
fólks um hlutverk foreldra og viðkomandi stofnana og jafnframt á þátt
mannanafna í mótun ímyndar einstaklings og þjóðar.
Hvað gerist ef nafns er vitjað sem er ekki á mannanafnaskrá, sem
brýtur í bága við íslenskt málkerfi eða gæti orðið nafnbera til ama?
Hafa huldukonunöfn samkvæmt skilgreiningu unnið sér hefð í íslensku
máli - eða menningarhelgi? Af hverju kaus Jorge Ricardo Cabrera
Hidalgo að heita Eilífur Friður?
Kendra vinnur nú að doktorsritgerð um íslensk gælunöfn, og hefur um
þessar mundir aðstöðu á Stofnun Árna Magnússonar.
Nánari upplýsingar um starf Félags þjóðfræðinga er að finna á
slóðinni http://www.akademia.is/thjodfraedingar/
Allir velkomnir!
Með kveðju f. hönd félagsins,
Aðalheiður Guðmundsdóttir
Stofnun Árna Magnússonar
Árnagarði við Suðurgötu
tel.: (354) 868 0306/ (354) 552 0510
http//:www.hi.is/~adalh
More information about the Gandur
mailing list