<!DOCTYPE html PUBLIC "-//W3C//DTD HTML 4.01 Transitional//EN">
<html>
<head>
</head>
<body bgcolor="#ffffff" text="#000000">
<div align="left"><br>
<big><b>Íslandsmyndir í Hafnarhúsi</b></big><br>
<br>
</div>
<pre>
Kviksaga frumsýnir, í samstarfi við Listasafn Reykjavíkur og
rannsóknarverkefnið Ísland og ímyndir Norðursins, heimildamyndina
<b>Huldufólk 102 eftir Nisha Inalsingh.</b>
<b>31. janúar 2008, kl. 17.30 – 19.30 í Hafnarhúsi.</b>
Kristinn Schram, þjóðfræðingur, fylgir myndinni úr hlaði.
Að mynd lokinni munu meðal annars Kristinn, Terry Gunnell og Unnur
Þóra Jökulsdóttir ræða um myndina og hlutverk huldufólks í
menningarlífi og ímynd Íslands.
Aðgangur ókeypis
<b>Um myndina</b>
Ósýnileg þjóð á dularfullri eyju, lífseig þjóðtrú sem
mótar líf Íslendinga, gatnakerfi og jafnvel dagleg samskipti.
Með þessa vaxandi mynd af landi og þjóð í farteskinu kannar
heimildamyndagerðamaðurinn Nisha Inalsingh Ísland og leyndardóma
náttúrunnar. Með mynd sinni Huldufólk 102, kannar hún mismunandi
skoðanir fólks til huldra vætta, kafar ofan í reynslusögur og
tengir við hnattræna stöðu landsins, einangrun, vetrarnætur og
náttúruundur. Með undirleik hljómsveita á borð við Múm og
Sigur Rós er leitað svara við leyndardómum og reynt á takmarkanir
mannlegrar skynjunar. Sjónarspilinu er ætlað að varpa ljósi á
þær þverstæður sem búa í hlutskiptum manna: einfaldleiki þess
sem við búum við í okkar hversdagslífi gegnt þeim
margbreytileika sem við sjáum ekki í eigin heimi. Huldufólk 102 er
fyrst í röð Íslandsmyndasýninga Kviksögu í Hafnarhúsinu í
ár. Hér er um Íslandsfrumsýningu að ræða en hún hefur hlotið
lof á fjölmörgum alþjóðlegum kvikmyndahátíðum.
<a class="moz-txt-link-abbreviated" href="http://www.huldufolk102.com">www.huldufolk102.com</a>
<b>Um Íslandsmyndir</b>
Íslandsmyndir er yfirheiti á fjölbreyttum kvikmyndum sem eiga það
sameiginlegt að fjalla um Ísland og Íslendinga. Myndirnar eru
margvíslegar að eðli, s.s. fræðslumyndir, persónulegar
ferðasögur, pólitískar áróðursmyndir, sölumyndbönd
flugfélaga, fiskiðnaðarins eða landbúnaðarvöruframleiðenda og
myndir sem skreyttu ræður farandfyrirlesara. Kvikmyndirnar viðhalda
og endurskapa ákveðnar ímyndir sem tekið höfðu að mótast á
18. og 19. öld. Samfélagið breytist og Íslandsmyndir með en
takmarkanir miðilsins setja umfjöllunarefninu einnig nokkrar
skorður. Íslensk tunga hvarf nánast sem viðfangsefni, enda ekki
mjög myndvæn. Saga Íslands missti vægi og tengdist Þingvöllum og
styttum af þjóðhetjum nánum böndum. En náttúran hófst til vegs
og virðingar. Íslendingar voru (og eru) náttúrubörn í
Íslandsmyndum en þegar kom fram á 5. áratug 20. aldar urðu
náttúrubörnin tæknivædd. Íslendingar, einkum íslenskir
karlmenn, voru umfram allt sjómenn og bændur sem börðust við
náttúruöflin til að færa björg í bú en höfðu jafnframt
sigrast á náttúrunni með því að virkja hana til húshitunar og
rafmagnsframleiðslu. Er þetta ef til vill svipuð ímynd og við
sjáum í Íslandsmyndum nútímans? Þetta er meðal þess sem
kannað verður í sýningum og umræðum Kviksögu í vetur.
<b>Um Kviksögu</b>
Kviksaga er félagskapur um kvikmyndalist og fræði. Það er
vettvangur fræði- og áhugamanna á því sviði þar sem fræði og
kvikmyndalist mætast t.d. við gerð heimildamynda, vídeólistar,
kennsluefnis eða sjónrænna rannsókna á menningu og listum.
Kviksaga stuðlar einnig að rannsókn á sjálfu kvikmyndaforminu og
er vettvangur fyrir áhugasama til að mætast, ræða og vinna
saman. Á síðastliðnu ári hefur Kviksaga efnt til sýninga á
heimildamyndum ásamt fræðilegri umfjöllun, haldið námskeið og
staðið að kvikmyndahátið. Áfram verður staðið að viðburðum
og á vefritinu Kviksögu <a class="moz-txt-link-abbreviated" href="http://www.kviksaga.is">www.kviksaga.is</a> verður að finna
ritstýrðar greinar, viðtöl, tilkynningar og myndbrot á sviði
fræða og kvikmyndlistar. Skrifstofa Kviksögu í
ReykjavíkurAkademíunni er öllum opin til skrafs og ráðagerða og
til afnota af myndefni og tengslaneti miðstöðvarinnar.
Upplýsingar í 8661940 og <a class="moz-txt-link-abbreviated" href="mailto:kviksaga@akademia.is">kviksaga@akademia.is</a>
Síðastliðið ár stóð Kviksaga meðal annars að viðburðum í
Tjarnarbíóí í samvinnu við Fjalaköttinn þar sem saman fóru
sýningar á heimildamyndum, tónlistarflutningur, fræðileg
umfjöllun og samræður við kvikmyndgerðamenn. Af myndum má nefna
svokallaðar Íslandsmyndir sem spanna alla tuttugustu öldina, video-
og tónlistarverkið Lífsblómið, heimildamyndir um frásagnir
sjúkraflutningamanna í Kaliforníu og leigubílstjóra í Edinborg
og um pönkbylgju í Suður-Kóreu. Þá má nefna viðburði sem
sérstaklega voru helgaðir verkum í vinnslu þar sem
kvikmyndagerðamenn sýndu brot úr verkum sín, ræddu undanfara og
næstu skref við áhorfendur.
Um rannsóknarverkefnið Ísland og ímyndir Norðursins
<a class="moz-txt-link-abbreviated" href="http://www.inor.is">www.inor.is</a></pre>
</body>
</html>