[Gandur] Vegna aðalfundar
Aðalheiður Guðmundsdóttir
adalh at hi.is
Sun Mar 19 21:41:46 GMT 2006
Kæru þjóðfræðingar,
eins og nánar verður auglýst síðar, verður aðalfundur Félags
þjóðfræðinga á Íslandi haldinn þann 4. apríl n.k. Af því tilefni
langar mig til að vekja athygli á nokkrum staðreyndum um vetrarstarf
félagsins 2005-2006.
Sl. vor var starfsemi félagsins heldur lítil, enda hafði það sýnt sig
að áhugi félagsmanna á félagsstarfinu var takmarkaður, og stundum
mættu ekki nema 5-6 manns á fyrirlestra. Við sem vorum kosin í stjórn
í fyrravor vorum bjartsýn á að okkur tækist að rífa starfsemina upp.
Vetrarstarfið hefur verið öflugt, fyrirlestrar og aðrar uppákomur á
u.þ.b. hálfs mánaðar fresti fyrir jól, en eftir jól höfum við sett
stefnuna á örlítið færri atburði, en stærri.
Í stuttu máli sagt þá hefur þetta tekist ágætlega. Yfirleitt hafa um
20 manns mætt á fyrirlestra og þemakvöld, en fleiri á tónleika (allt
upp í 50 manns). Stakir fyrirlestrar, s.s. um drauma og
jarðarfarasiði í Afríku voru mjög vel sóttir. En höfum við þá yfir
einhverju að kvarta? Ekki nema kannski helst því að þjóðfræðingar
voru afar sjaldséðir á þessum viðburðum. Fyrir utan stjórnina sá ég
einu sinni einn félagsmann, en stundum voru þeir líklega 2-3.
Þá vaknar auðvitað spurningin, fyrir hverja stöndum við í þessu? Er
réttlætanlegt að stjórn lítils félags haldi uppi öflugri starfsemi
bara til að halda nafni félagsins/ þjóðfræðinnar á lofti? Er eitthvað
vit í því að vera að keppa við fjöldann allan af félagasamtökum og
öðrum sem bjóða upp á afþreyingu fyrir hina og þessa? Vissulega höfum
við vakið einhverja athygli á félaginu og fengið fólk úr ýmsum áttum
til að koma og hlýða á það sem við höfum í boði. Ég veit að þetta er
eitt af hlutverkum FÞ, að kynna fræðigreinina út á við, en spurningin
er á það að vera það eina sem félagið gerir?
Mig langar því að spyrja félagsmenn hreint út: Hvers vegna mætið þið
ekki á uppákomur okkar? Mér detta nokkrar ástæður í hug:
1. Fyrirlestrarnir eru óspennandi - og uppákomur félagsins almennt.
2. Hef ekki áhuga, hversu góð sem dagskráin er.
3. Hef ekki tíma.
Ég þykist vita að margir hafa ekki tíma, því að við þekkjum það öll
að það er margt í boði og að stundum getur verið erfitt að koma sér
út á kvöldin. Ég myndi samt gjarnan vilja fá álit ykkar á þessu, sem
og spurningunum:
Á félagið að halda áfram svipaðri starfsemi næsta ár?
Á félagið að hætta allri starfsemi? - þ.m.t. samstarfi við
Sagnfræðingafélagið um Landsbyggðarráðstefnur (aðeins örfáir
þjóðfræðingar mættu á Kaflavíkurráðstefnuna þann 4. mars sl.)?
Á félagið að fækka viðburðum verulega? - er það ekki sjálfsblekking
að halda að slíkt skipti máli, þ.e. er það nokkur hvati á mætingu
þjóðfræðinga?
Er þörf á félagi fyrir þjóðfræðinga?
Ef já, þá til hvers? Hvernig á slíkt félag að starfa.
Að lokum bið ég þá sem hafa áhuga á að starfa með stjórninni um að
gefa sig fram. Sjálf hef ég ekki ákveðið hvort ég gef kost á mér
áfram, og hef ekki heyrt neitt í þá veru frá öðrum stjórnarmeðlimum.
Það er engu að síður gott að vita hvort og þá hversu mikill áhugi er
fyrir hendi. Ennfremur, ef ég - sem formaður - er ekki að gera
félagsmönnum til hæfis, væri gott ef einhver annar treysti sér til
þess. Það er líka spurning- fyrst það eina sem vetrarstarfið skilur
eftir sig er að kynna fræðigreinina og félagið út á við - hvort
heppilegt er að slíkt sé í höndum íslenskufræðings. Eru ekki
einhverjir þjóðfræðingar í félaginu með brennandi áhuga á að taka við
og halda nafni fræðigreinar sinnar á lofti?
Þetta mætti e.t.v. ræða á aðalfundinum, eða - ef menn komast ekki á
hann - ræða málið - og koma með tillögur hér á Gandi.
Með bestu kveðjum,
Aðalheiður Guðmundsdóttir
More information about the Gandur
mailing list